झेरॉक्स काढायला गेलेली मुलगी बेपत्ता;अज्ञात व्यक्तीविरुद्ध गुन्हा दाखल -

सोलापूर – दक्षिण सोलापूर तालुक्यातील भंडारकवठे येथून एक धक्कादायक घटना समोर आली आहे. झेरॉक्स काढण्यासाठी बाजारात जाते, असे सांगून घराबाहेर पडलेली १६ वर्षे ९ महिन्यांची अल्पवयीन मुलगी रहस्यमयरीत्या बेपत्ता झाली आहे. याप्रकरणी मंद्रूप पोलीस ठाण्यात अज्ञात व्यक्तीविरुद्ध अपहरणाचा गुन्हा दाखल करण्यात आला असून पोलीस मुलीचा कसून शोध घेत आहेत.

नक्की काय घडले?-

पोलिसांनी दिलेल्या माहितीनुसार, भंडारकवठे येथील ही अल्पवयीन मुलगी शुक्रवारी (१० जुलै) सकाळी ११ वाजण्याच्या सुमारास घराबाहेर पडली होती. “मी बाजारात झेरॉक्स काढण्यासाठी जाते,” असे तिने आपल्या आईला सांगितले होते. मात्र, दुपार उलटली आणि रात्र झाली तरीही ती घरी परतली नाही.मुलगी वेळेत घरी न आल्याने घाबरलेल्या कुटुंबीयांनी तातडीने तिचा शोध सुरू केला. नातेवाईक, तिचे मित्र-मैत्रिणी आणि संभाव्य सर्व ठिकाणी चौकशी करण्यात आली, मात्र तिचा कुठेही ठावठिकाणा लागला नाही.

भावाची पोलिसांत फिर्याद-

अखेर याप्रकरणी मुलीच्या भावाने मंद्रूप पोलीस ठाण्यात धाव घेत तक्रार दाखल केली. अज्ञात व्यक्तीने बहिणीला कसले तरी आमिष दाखवून किंवा फूस लावून पळवून नेल्याचा संशय फिर्यादीत व्यक्त करण्यात आला आहे. भावाच्या तक्रारीवरून पोलिसांनी अज्ञात आरोपीविरुद्ध अपहरणाचा गुन्हा नोंदवला आहे.